Kryetari i Lidhjes Demokratike të Kosovës (LDK), Lumir Abdixhiku, ka reaguar lidhur me draft-statutin e përpiluar nga Ekipi Menaxhues i bërë publik në medie.

Sipas tij, ky draft është më tepër se Asociacion dhe është më tepër se Autonomi, pra, është shtet brenda shtetit; Republikë brenda Republikës, raporton Arbresh.info.

“Dokumenti i draft-statutit, i përpiluar nga Ekipi Menaxhues, e i bërë publik në medie është më tepër se Asociacion dhe është më tepër se Autonomi – është shtet brenda shtetit; Republikë brenda Republikës. Ky draft-statut, në të 67 nenet e në nëntë kapitujt e tij, projekton Federalizimin e Kosovës si koncept të ri organizativ pas shpalljes së pavarësisë”, shprehet Abdixhiku.

Në Kosovë, sipas tij, nuk do të ketë parti, nuk do të ketë qeveri e nuk do të ketë njeri që mund ta pranojë një organizim të tillë.

“Një trup që nxjerrë ligje, menaxhon asete kombëtare, pasuri publike e burime natyrore, një trup që organizon zgjedhje, mbanë referendume e merr kompetenca nga Kuvendi dhe Qeveria e Kosovës – nuk ka vend në rregullimin tonë shtetëror e kushtetues. Si i tillë, ai jo vetëm që duhet të refuzohet si bazë negociuese por dhe të refuzohet si ambicie politike”, thotë ai.

Sipas kreut të LDK-së, Qeveria e Kosovës duhet të marrë pronësinë në procesin vijues.

Asociacioni, sipas tij, bëhet nga institucionet tona dhe atë vetëm brenda rendit tonë kushtetues.

“Çdo ikje nga përgjegjësia është dorëzim dhe çdo dorëzim sjellë dokumente e koncepte të tilla; siç ka ndodhur dhe me këtë tani”, përfundon Abdixhiku./Arbresh.info/